A arte dos graffiti chega a Carballo

Este antroido vai ter na nosa vila unha atracción curiosa e sorprendente. Gracias ó traballo de dous mozos, o carballés Alejandro Castro e mailo coruñés Cristian Diamante, vaise celebrar nas galerías da zona da Igrexa o “Graff-Time 2006”.

A iniciativa consiste en habilitar as paredes desas galerías......para que, durante a fin de semana do 24 e 25 de febreiro, un grupo de estudantes de Belas Artes mostren as súas cualidades e demostren ós máis incrédulos que o graffiti é unha forma de expresión artística. A realización dos murais comezará o venres ás 12 da mañá e rematará o sábado. Os dous días haberá concertos con grupos de rap e DJ´s a partir das 6 da tarde. Haberá un muro libre onde os espontáneos poidan demostrar as súas artes (a ver se algún se esquece definitivamente de facelo nos espazos públicos).

Tanto o Concello de Carballo coma os propietarios dos comercios das galerías axudan e apoian unha idea que servirá para que os graffiti vaian perdendo a súa imaxe vinculada ás pintadas de gamberros. Tal e como afirmaba o alcalde na Voz de Galicia, “non se trata de domesticar ningún tipo de expresión, senón que a arte está continuamente en revisión e foi gañando novos espazos de expresión”.

Atrevémonos a dar unha idea: En lugar de que o acto se celebre só nesta ocasión, ¿por qué non instaurar un concurso anual de graffiti? Sería unha forma de mellorar a estética dalgún espazo comercial, de mellorar o entorno urbano, e unha iniciativa interesante e novidosa. Dito queda.