Movementos sísmicos

(Desta volta non reais, senón políticos). Víase vir. Nas últimas datas o BNG de Carballo traspasou varias veces a liña vermella que separa as competencias co CDI, e ocasionou un novo conflicto de intereses entre os dous principias grupos de goberno.

Como xa destacaramos anteriormente, na fin de semana o concelleiro Lois Lamas atribuíase o mérito das inversións de Medio Rural para reparar unha serie de pistas nas parroquias. E onte o BNG respostaba ás críticas do PP enumerando unha serie de obras entre as que se atopaba a Vila de Negreira, competencia de Manuel Andrade.

Coma dúas placas tectónicas que colisionan, hoxe déixanse sentir os temblores do choque, e Andrade volve á carga contra os nacionalistas cos mesmos argumentos: invasión de competencias e falta de respecto ó pacto de goberno. Segundo di o concelleiro de obras e urbanismo, el non se adica a falar de Cultura, Deporte ou Mantemento (esto é certo, dende logo).

Así que tampouco nada novo que non viramos repetidamente nesta lexislatura. Se cadra a variante é que cada vez se achegan máis as eleccións, e cada vez a tensión e a ansia por rentabilizar a posición de poder van a máis. ¿Veremos un terremoto destructivo antes da consulta electoral ou manterase o equilibrio entre intereses comúns e intereses contrapostos?